
403ཞུ་བ་པོ་མེད་པར་རྟ་མཆོག་རོལ་པའི་སྒྲུབ་ཐབས་བཀའ་རྩོམ་གནང་བའི་སྐོར།
47-6-3
༄༅། །ཞུ་བ་པོ་མེད་པར་རྟ་མཆོག་རོལ་པའི་སྒྲུབ་ཐབས་བཀའ་རྩོམ་གནང་བའི་སྐོར།
༄༅། །ཞུ་བ་པོ་མེད་པར་རྟ་མཆོག་རོལ་པའི་སྒྲུབ་ཐབས་བཀའ་རྩོམ་གནང་བའི་སྐོར། །དཔལ་གདོང་ཞེས་པ་ཆུ་བྱ་གནམ་ལོའི་དབང་ཕྱུག་གསར་དུ་ཚེས་པའི་དགའ་སྟོན།དབང་པོ་ཉེར་བརྒྱད་ཀྱི་གཙོ་བོ་དམག་ཟོར་མའི་དུས་གཏོར་སོགས་རྒྱས་པར་བསྟར། བར་སྐབས་འདི་དག་ཏུ་འཇིགས་བྱེད་ཀྱི་སྒྲུབ་ཐབས་ཟ་མ་ཏོག གསོ་སྦྱོང་། རྣམ་རྒྱལ་མ། རྣམ་འཇོམས། ཆ་གསུམ། མགོན་པོའི་བཀའ་གསོ་རྣམས་ཐུགས་འཛིན་དང་། སྐུ་གོང་མའི་རྣམ་ཐར་དུ་ཀཱུ་ལ་ཀ་པ། རིན་སྤུངས་པའི་སྙན་ངག་འགྲེལ་པ། གཡའ་སེལ། མཛད་བརྒྱ་སོགས་ལྗགས་ཀློག་གནང་། ལོ་སྔ་མའི་མཇུག་ནས་དབུ་བཙུགས་ཟླ་བ་འདིའི་ཚེས་བཅུའི་ཉིན་གྲུབ་པར་དཔལ་ཆེན་རྟ་མཆོག་རོལ་བའི་སྒྲུབ་ཐབས་ཞུ་བ་དང་འཆར་འབུལ་སོགས་གང་ཡང་མེད་པར་ཐོག་མ་ཕྱག་བྲིས་དང་། རྗེས་སུ་གྲུབ་གླིང་བློ་བཟང་དངོས་གྲུབ་ཀྱིས་ཡི་གེ་པ་བྱས་ཐོལ་བྱུང་དུ་བཀའ་རྩོམ་བརྩེ་བས་བསྐྱངས་པའི་མཆོད་བརྗོད་དུ།རྟ་མགྲིན་དབང་ཆེན་མཁྱེན་བརྩེ་ནུས་མཐུ་ཡིས། །བདུད་རྣམས་གཞོམ་མཛད་དགྲ་བགེགས་ཕྱེ་མར་འཐག །རྭ་གའི་མདོག་ལྟར་དམར་བ་སྲིན་པོའི་གཟུགས། །དུས་ཀྱི་བྱིན་ཟའི་དབུས་ན་འགྱིང་བའི་གར། །རབ་འབར་བེ་ནོན་གདེངས་པའི་མོད་ཉིད་ལ། །ཁྲོ་རྒྱལ་ཕལ་གྱི་ལག་ཆ་དུས་གཅིག་འཆོར། །
47-6-4
དྲི་ང་མགོ་བོ་རྒྱུ་མར་བརྒྱུས་པའི་འཕྲེང་། །འཕྲལ་བསད་ལྤགས་རློན་ལྡིང་སྟབས་གོས་ཀྱིས་ཀྱང་། །མ་ཚིམ་སྙིང་གི་ཁྲག་དྲོན་འཐུང་བ་དང་། །ལྷན་ཅིག་ཐལ་ཞག་ཁྲག་གི་ལུས་ཀུན་བྱུགས། །རུ་དྲ་བསྒྲལ་བའི་དཔལ་དང་དུར་ཁྲོད་ཆས། །དཔའ་རྟགས་ལོག་འདྲེན་ཚོགས་ལ་ངོམ་བཞིན་དུ། །ཀ་དག་གདོད་མའི་རྩལ་གྱིས་འཁོར་འདས་ཆོས། །ཟད་མཐའི་ལྷུན་གྲུབ་མཁའ་ལ་ནམ་འཕང་གཅོད། །ལྷ་སྔགས་ཡེ་ཤེས་རྡོ་རྗེ་བེ་བོན་ནི། །ནམ་མཁར་འཕྱར་ཚེ་འབྱུང་པོ་སྦྱིན་སྐྱེས་མོའི། །མངལ་ལྷུང་ཆབས་ཅིག་ལུས་མེད་སྨག་ནི་སངས། །ཞེས་པ་དང་།སྐྱབས་སེམས་བགེགས་བསྐྲད་སྲུང་འཁོར་བྱིན་དབབ་ཅིང་། །མཆོད་སྦྱིན་བརླབ་དང་བཤགས་པ་སྔོན་འགྲོ་བདུན། །ཞེས་སྔོན་དུ་འགྲོ་བའི་དོན་བྱང་ཆུབ་ཡན་ལག་གི་གྲངས་དང་།དམ་ཚིག་བསྐྱེད་དང་སྤྱན་འདྲེན་དང་། །བཞུགས་གསོལ་ཕྱག་འཚལ་མཆོད་འབུལ་བསྟོད། །འཛབ་བཟླས་བདུན་ནི་དངོས་གཞིའོ། །ཞེས་དངོས་གཞིའི་ལས་རིམ་བདུན།ཚོགས་དང་ལྷག་མ་ཐུགས་དམ་བསྐུལ། །ཆད་མཐོ་བསྒྲག་ཅིང་བསྟན་མ་སྐྱོང་། །
47-6-5
གཏོར་མནན་དངོས་གྲུབ་བླང་བ་དང་། །བསྡུ་ཆོག་བཟོད་གཤེགས་སྨོན་ལམ་གདབ། །ཤིས་བརྗོད་བཅུ་གཉིས་རྗེས་ཀྱི་ཆོས། །ཞེས་རྗེས་ཀྱི་ཆོ་ག་བཅུ་གཉིས་དང་བཅས་ཏེ་ཚིག་དོན་མཐའ་དག་ཕུན་སུམ་ཚོགས་པ་འདི་ཉིད་སྩལ། སྐུའི་བགེགས་སེལ་དུ་ལྷ་ས་དང་པོ་ཏ་ལ། གཞིས་རྩེ། མཚོ་སྣ། བསམ་ཡས། ཁྲ་འབྲུག་སོགས་སུ་གསུང་སྒྲོག མཆོད་འབུལ། སཱཙྪ་སོགས་རྒྱས་ཙམ་བསྟར་བ་དུ་ཀཱུ་ལ་ལྟར་རོ།།ཟླ་བ་བཅུ་གཉིས་པའི་ཚེས་བཅུ་ལ་ཆོས་རྗེ་ཟིལ་གནོན་རྡོ་རྗེ་འབྱོར་ཞིང་བཀའ་ཤོག་དང་རྟ་མགྲིན་དབང་ཆེན་གྱི་སྒྲུབ་ཐབས་བཅས་ཕེབས་པ། བཀའ་རྩོམ་གྱི་བབས་སྔ་འགྱུར་གྱི་ཚིག་ཤན་སོགས་རྩོམ་རིགས་རྗེ་གོང་མ་དང་དབྱེར་མེད་ལྟ་བུར་འདུག་པ་ངེད་རང་དང་ཉེ་སྐོར་བ་འདྲེན་བྱེད་ཀྱི་ཡུལ་དུ་གྱུར་པ་ཐམས་ཅད་དད་པ་འཕེལ་ཞིང་དགའ་བ་དང་སྐྱོ་བ་ཕན་ཚུན་འགྲན་པས་མཆི་མ་དབང་མེད་དུ་ཤོར་བ་བྱུང་། ཞེས་རབ་གསལ་གསེར་གྱི་སྙེ་མར་གསལ་བ་ཇི་བཞིན་འདིར་དྲངས་ཤིང་། ཡང་དེ་ཉིད་ལས།ཟླ་བ་བཅུ་པའི་ཚེས་བཅུའི་མཚན་མོ་མི་དམར་པོ་གྲི་མདུང་བཟུང་བ་ཞིག་བྱུང་ནས་ལྷོ་ནུབ་ཏུ་ཏལ་གྱིས་སོང་། ཚེས་བཅོ་ལྔ་ལ་འཇམ་དབྱངས་ཨ་ར་པ་ཙ་ནའི་སྒྲུབ་ཐབས་མ་རིག་མུན་སེལ་རྟ་མགྲིན་དབང་ཆེན་སྒྲུབ་ཐབས་ཀྱི་བབས་དང་མཚུངས་པ་སུག་བྲིས་སུ་སྩལ།།༼དཔེ་སྒྲིག་པའི་མཆན། ཞེས་རབ་གསལ་གསེར་གྱི་སྙེ་མར་གསལ་ནའང་། རྟ་མགྲིན་དབང་ཆེན་གྱི་སྒྲུབ་ཐབས་དང་། འཇམ་དབྱངས་ཨ་ར་པ་ཙ་ནའི་སྒྲུབ་ཐབས་མ་རིག་མུན་སེལ་གྱི་གཞུང་དངོས་རྣམས་ལག་སོན་མ་བྱུང་བས་འདིར་འགོད་ཐབས་བྲལ་བ་བཅས་ནི་གསལ་བཤད་ཙམ་མོ།།༽



